Samarqandda 48 soat ichida qayerlarga borish mumkin
Dam olish kunlarida sayohat qilishni rejalashtiradiganlar uchun qisqa vaqt ichida koʻp narsaga ulgurish muhim hisoblanadi. Boqiy va hamisha navqiron Samarqand shahri sayohatchilar orasida mashhur boʻlgan maskanlardan biri hisoblanadi.
Shu sababdan Afisha.uz ushbu maqolada Samarqandda 48 soat ichida nimalar qilish mumkinligi haqida soʻz yuritadi.
Registon va uning yaqinidagi majmualar
Albatta, Samarqandga sayohat qilish jarayonida Registonga bormaslik mumkin emas. Sayohatni ham aynan shu yerdan boshlash mumkin. XV asrda qurib bitkazilgan Ulug‘bek, Sherdor va Tillakori madrasalari tarixiy vaybni his qilishni boshlash uchun ajoyib variant hisoblanadi.
Bundan tashqari, Samarqand va Temuriylar davlati bilan bogʻlash mumkin boʻlgan boshqa qadamjolar, xususan Goʻri Amir va Bibixonim maqbarasi ham Registon maydoni yaqinida joylashgan. Shu sababdan bir vaqtning oʻzida bu yerlarga ham borish mumkin.
Shohi Zinda maqbarasi
Yuqoridagi roʻyxat toʻliq boʻlishi uchun “Samarqand marvaridi” nomini olgan Shohi Zinda maqbarasiga ham tashrif buyurish kerak boʻladi.
Bu yerdagi har bir maqbara faqat o‘zigagina xos bezaklar bilan qoplangan bo‘lishiga qaramay ularning barchasi yaxlit bir kompozitsiyani, tugal bir me’morchilik asarini tashkil etadi. Shohizindaning yana bir muhim tomoni shundaki, bu yerda Samarqandning qariyib uch ming yillik tarixi mujassamdir.
Siyob bozori
Qaysidir hudud va u yerda yashaydigan aholi haqida koʻproq ma’lumotga ega boʻlishni istaydigan odamlarga oʻsha joyning bozoriga borish tavsiya etiladi. Samarqand shahridagi katta va mashhur bozor — Siyob hisoblanadi.
Ushbu bozor nafaqat Oʻzbekistondagi, balki Markaziy Osiyodagi eng qadimiy bozorlardan biri boʻlib, shahardagi sayyohlar eng koʻp tashrif buyuradigan joylardan biri hisoblanadi.
Bozordagi savdo rastalari ularda sotiladigan mahsulotlar turlariga koʻra ajratiladi: maishiy mahsulotlar, goʻsht, sabzavotlar, mevalar, yongʻoqlar, sharqona shirinliklar, ziravorlar, yormalar, non va tortlar.
Kiyim va uy-roʻzgʻor buyumlari joylashgan alohida doʻkonlar ham mavjud. Qarindoshlar yoki hamkasblar uchun har xil shirinliklar sotib olish niyatida boʻlsangiz, Siyob ayni muddao boʻla oladi.
Afrosiyob qadimgi manzilgohi
Samarqanddagi asosiy qadamjolar qatorida Afrosiyob manzilgohi ham eslab oʻtiladi. 3000 yillik tarixni oʻzida mujassam etadigan manzil shahardagi boshqa majmualardan farq qiladi va uzoqroq tarixga shoʻngʻishga chorlaydi.
Ma’lumot uchun, Afrosiyobda ganch o‘ymakorligi bilan bezalgan saroylar, zodagon dehqonlar va yer egalarining uylari, masjid va madrasalar, hammom va suv inshootlari, Somoniylar davrida qurilgan ko‘chalar topilgan.
Joni osh
Alohida ovqat sifatida mashhurlikka erisha olgan Samarqand oshini koʻhna shaharning oʻzida tatib koʻrish ham sayohatning unutilmas bir qismiga aylanadi. Buning uchun esa soʻngga vaqtlarda koʻp bor tilga olinayotgan “Joni osh” kafesiga borish mumkin.
Afisha.uz muxbirlari 2024-yil 29-avgust kuni Samarqandga avtomobilda qilingan sayohat boʻyicha video tayyorlagandi. Unda ham “Joni osh"ga alohida toʻxtalib oʻtiladi.
Ovqatlanish maskani soat 11:00 dan 21:00 gacha faoliyat koʻrsatadi.
Murojaat uchun telefon raqami: (+998) 97−030−0005.
Family Park
Xalqaro darajada qurilgan ushbu ko‘ngilochar majmua tarixiy qadamjolardan biroz dam olishni xohlovchilar uchun moʻljallangan deyish mumkin. Zamonaviy uslubda qurilgan savdo markazida qulay xarid qilish va dam olish uchun barcha sharoitlar mavjud: kinoteatr, konkida uchish maydoni, fud-kort, kitob do‘koni, bouling va boshqalar.
Kuniga minglab odam tashrif buyuruvchi markaz ayniqsa, o‘zining muz maydoni, oilaviy kinoteatri (kinoteatrdagi seanslar jadvalini Afisha.uz saytida topish mumkin) va bouling xizmatlari bilan aholi orasida ancha ommalashgan. Ko‘ngilochar majmuada keng yer osti avtoturargohi ham mavjud.
Ish tartibi: har kuni soat 09:00 dan 23:00 gacha
Boqiy shahar
Samarqandning mini versiyasiga sayohat qilish va bir vaqtning oʻzida ham tarixiy, ham zamonaviy majmualarni tomosha qilish va yaratilgan koʻldan zavq olish uchun 7 gektar maydonda qurilgan Boqiy shaharga borish mumkin. Lekin bu Samarqandning biroz chetida joylashgni uchun koʻproq vaqt olib qoʻyishi mumkin.
Boqiy shahar majmuasining markazida 1 ta galereya va qadimiy sharqona bozor, 36 ta rastadan iborat 14 ta hunarmandchilik ustaxonalari, 2 ta milliy taomlar restorani qurilgan. Tor koʻchalarda rassomlar, hunarmandlar va duradgorlarning doʻkonlari joylashgan.
Boqiy shaharga tashrif buyurish orqali mamlakatning turli davrlari va mintaqalari milliy taomlarini tatib koʻrishi va haqiqiy koʻcha tomoshalarning guvohi boʻlishi mumkin boʻladi. Afisha.uz 2024-yilda mazkur kompleks haqida batafsil sharh yozgan edi.
Ulugʻbek rasadxonasi
Temuriylar sulolasida Mirzo Ulugʻbek oʻzining ilm-fan rivojiga qoʻshgan hissasi bilan ajralib turadi. Samarqand shahrida joylashgan Ulugʻbek observatoriyasiga borish orqali buni yanada yaqindan his qilish mumkin.
Rasadxona sxemasiga ko‘ra, bu dumaloq uch qavatli bino boʻlib, diametri 46,4 metr va balandligi kamida 30 metr boʻlgan marmar kvadrantni oʻz ichiga oladi. Ulug‘bek rasadxonasida yirik astronomlar, Ulug‘bek, Ali-Qushchi va Qozizoda ar-Rumiyning shogirdlari ishlagan.
Bu manzil ham shaharning chetida joylashgani uchun odatdagidan biroz koʻproq vaqt talab qiladi. Majmua ertalab soat 08:00 dan kechki 20:00 gacha ishlaydi.
Chipta narxi: mahalliy sayyohlar uchun 10 ming so‘m, chet ellik turistlarga esa 40 ming so‘m.
Material Turizm qoʻmitasi koʻmagida tayyorlandi.
