Samsung dunyodagi eng mashhur smartfon davomchisi – Galaxy A16'ni taqdim etdi

Samsung kompaniyasi (Counterpoint tahlilchilariga koʻra) dunyodagi eng ommabop smartfon — Galaxy A15 5G vorisi boʻlgan yangi Galaxy A16 5Gʻni taqdim etdi.

Yangi mahsulotning old panelida 13 MP old kamera uchun Infinity-U kesimi bilan Super AMOLED displey joylashgan. Ekran diagonali 6,7 dyum, oʻlchami esa Full HD+, 90 Gts tasvirni yangilash tezligini qoʻllab-quvvatlaydi. Orqa tomonga uchta kamera oʻrnatilgan: 50 megapikselli asosiy, 5 megapikselli keng burchakli va 2 megapikselli makro.

Telefonga Exynos 1330 yoki Dimensity 6300 chipi oʻrnatilgan (sotuv hududiga qarab). 4 GB operativ xotira va 128 GB ichki xotira mavjud bo‘lib, uni 1,5 TB gacha bo‘lgan xotira kartalari bilan kengaytirish mumkin. Batareya hajmi esa 5000 mA / soat boʻlib, 25 Vt quvvatni qoʻllaydi.

Smartfon korpusi IP54 standarti bo‘yicha suv va changdan himoyalangan bo‘lib, u to‘rt rangda sotiladi: to‘q ko‘k, firuza, tilla va kumush. Telefonning qalinligi 7,9 millimetrni tashkil qiladi. Yangi mahsulotda quloqchin uchun tirkish yoʻq. Galaxy A16 5Gʻning asosiy xususiyati — olti yillik Android va xavfsizlik yangilanishlari, ya’ni telefon 2030 yilgacha eng soʻnggi operatsion tizimni oladi.

Samsung Galaxy A16 5Gʻning Yevropadagi narxi 274 dollarni (3 490 000 so‘m) tashkil qiladi.