Futbol. Yomgʻirli kechada BAA taslim etilgan uchrashuvdan fotogalereya

Futbol boʻyicha Oʻzbekiston milliy terma jamoasi 15-oktyabr kuni Jahon chempionati 3-saralash bosqichi 4-turi doirasida BAA jamoasini qabul qildi. Uchrashuvda mezbonlar 1:0 hisobidagi gʻalabani qoʻlga kiritdi. Bu “oq boʻrilar"ning amirliklar ustidan Toshkentda qozongan ilk gʻalabasi boʻldi. Afisha.uz muxbirlari Yevgeniy Sorochin va Mirjalol Qosimov yomgʻirli kechadan fotoreportaj tayyorladi.

Oʻzbekiston milliy terma jamoasi 4-turni ham bosh murabbiysiz oʻtkazdi, Srechko Katanes kasalligi sababli uchrashuvga jamoani boshlab tusholmadi, ammo oʻyinni onlayn nazorat qilib bordi.

Oʻyin asosan mezbonlarning nazoratida oʻtdi. Uchrashuvning 65-daqiqasida BAA futbolchisi Abdulla Hamadga qoʻpollik uchun qizil kartochka koʻrsatildi. BAA uchrashuvning qolgan qismini bir kishi kam boʻlib oʻtkazdi.

Bahsning 76-daqiqasida BAA darvozasiga penalti belgilandi. 11 metrlik nuqtadan Otabek Shukurov zarba berdi va oʻyindagi yagona golga mualliflik qildi.

Uchrashuvdan so‘ng Jaloliddin Masharipov penaltini nega o‘zi tepmasdan Otabek Shukurovga berganini tushuntirdi. Futbolchining ta‘kidlashicha, u Qatardagi xatoni (penaltilar seriyasi gol urolmagandi) takrorlashni istamagan.

“Bugun “Shabab Al Ahli"da men bilan birga o‘ynagan bir necha futbolchi bor edi. Ular meni qanday zarba berishim haqida darvozabonlarga nimadir dedi. Qatarda qilingan xatoni bugun qaytarishni istamadik. Keyin Otabekka to‘pni berib, ular meni qanday zarba berishimini bilishlari haqida aytdim. Shu sababli to‘pni Shukurovga berdim”, dedi futbolchi uchrashuvdan keyin bergan qisqa intervyusida.

Shunday qilib, “oq boʻrilar” magʻlubiyatsiz seriyasini 20 taga yetkazib oldi. Terma jamoa oxirgi marta 2023-yilning 10-sentyabrida AQSHga yengilgandi (3:0). Katanes shogirdlari ushbu seriyadagi 7 ta oʻyinda durang qayd etdi (shularning uchtasi Eron bilan, Osiyo Kubogidagi penaltilar seriyasida Qatardan uchralgan magʻlubiyat rasman durang sifatida qayd etiladi), 13 tasida gʻalaba qozondi. Bu — rekord.

Amirliklar magʻlub etilgandan soʻng Oʻzbekiston terma jamoasi A guruhida 10 ochko toʻplagan holda ikkinchi oʻrinda bormoqda. Qatar bilan uchrashuvda yirik hisobdagi gʻalabaga erishgan Eron esa gollar nisbati evaziga 1-oʻringa koʻtarildi. Eng yaqin ta’qibchilaridan 6 ochkoga ilgarilab ketgan Katanes shogirdlari ilk bor mundialga chiqish uchun katta qadam tashladi.

Ma’lumot uchun, ushbu bosqichda guruhda 1 va 2-oʻrinni egallagan terma jamaolar toʻgʻridan-toʻgʻri JChga yoʻl oladi. 3−4-oʻrin egalari esa 4-bosqichda yana bahslar oʻtkazadi.

Oʻzbekiston milliy terma jamoasi 1-davra oxirgi uchrashuvini 14-noyabr kuni safarda Qatarga qarshi oʻtkazadi. 19-noyabrda esa KXDR bilan (katta ehtimol bilan) neytral maydonda uchrashadi.

Oʻzbekiston — BAA uchrashuvidan tayyorlangan katta fotoreportajni quyida tomosha qilishingiz mumkin.