Nodirbek Abdusattorov TOP-10 shaxmatchilar ro‘yxatiga kirdi

Nodirbek Abdusattorov o‘zbekistonlik shaxmatchilar orasida rekord o‘rnatdi. U dunyo bo‘yicha eng yuqori ball to‘plagan shaxmatchilar o‘nligiga kirdi.

Shaxmat bo‘yicha onlayn reyting yurituvchi 2700chess.com ma’lumotlariga ko‘ra, Nodirbek klassik yo‘nalishdagi ballarini 2753,5 ga yetkazib, 5 pag‘ona yuqorilagan holda TOP-10 ga kirdi. Uning rapid yo‘nalishidagi ballari esa 2733 ni tashkil qiladi. Abdusattorov 9-o‘rindagi xitoylik Yi Veidan atigi 1,5 ball ortda bormoqda.

Shuningdek, Nodirbek Abdusattorov kuchli o‘ntalikdagi eng yosh shaxmatchi sanaladi. U hozir 19 yoshda.

O‘zbekistonlik shaxmatchilar orasida bundan oldingi eng yaxshi natija Rustam Qosimjonovga tegishli bo‘lgan. U 2715 ball bilan 11-o‘rinni egallagan edi.

Mazkur reytingda 2830 ball bilan norvegiyalik mashhur shaxmatchi Magnus Karlsen yetakchilik qilmoqda. Undan keyingi o‘rinni AQSHliklar band etgan — Fabiano Karuana va Hikaru Nakamura. Ular tegishli tarzda 2804 va 2788 ball to‘plagan.