Antiqa sovchilar

Xalqimiz farzandini uylantirish va turmushga chiqarish masalasiga hamisha jiddiy qarab keladi. O‘ziga to‘q xonadonda unib-o‘sgan qizi Nargizni munosib joyga uzatish uchun otasi Izzatning boshi qotgan. Ota farzandini o‘ziga to‘q oilaga uzatishni ko‘ngliga tugib qo‘ygan. Lekin birin-ketin kelayotgan sovchilar bo‘lg‘usi kelinga o‘z shartlarini qo‘ya boshlashi yoki kuyovlikka noloyiq nomzodlardan otaning ensasi qotadi. Shunday kunlarning birida marhum otasi Izzatning tushiga kirib, o‘g‘liga suyumli nabirasini o‘zi yoqtirgan Baxtiyorga turmushga chiqarishni tayinlaydi. Baxtiyorni yaxshi bilsa-da Izzat uni kambag‘alroq deb ko‘nmayotgan edi. Otasining vasiyatini amalga oshirish uchun endi o‘zi Baxtiyorga “qizimga uylan” deb yalina boshlaydi. Spektakl nihoyatda kulguli voqealarga boy bo‘lib, har bir personajni ochib beradigan o‘ziga xos xarakter va qiyofalar topilgan. Yetakchi rollarni O‘zbekiston xalq artisti Mehri Bekjonova, O‘zbekistonda xizmat ko‘rsatgan artistlar Gulchehra Nosirova, Turg‘un Beknazarov, Hamid To‘xtayev, artistlar Xayrulla Inog‘omov, Munisa Vafoyeva, Bahrom Boltayev, Gulasal Rahmonova, Ilhom Otamirzayev va boshqalar ijro etadilar.