“Mabodo koʻrmay qolgan boʻlsangiz”: Oʻzbekcha YouTube hafta ichida
Oxirgi paytlarda YouTube’ning o‘zbek segmenti ham ancha faollashdi, kontentlar ko‘paydi. Hozir videolar shu darajaga yetdiki, ko‘rib tugatib bo‘lmaydi, hatto sifatli va mazmunlilarini ham. Hafta davomida e’lon qilingan materiallarni foydalanuvchilar keyinroq ko‘rish uchun o‘tkazib yuboradi, lekin u videoni keyinchalik eslamasligi ham mumkin. Shu munosabat bilan Afisha.uz har hafta oxirida YouTube‘da e’lon qilingan o‘zbekcha kontentlarni bir joyga to‘plab, “Mabodo ko‘rmay qolgan bo‘lsangiz” rukni ostida e’lon qilib boradi.
Koʻngilochar kontentlar
“Lolaning uzoq kutilgan konsertidan reportaj — 2024” | Afisha.uz
O‘zbek estradasining taniqli va o‘ziga xos vakili Lola 27−29-sentabr kunlari uzoq kutilgan yakkaxon konsertini taqdim etdi. Xonanda “Xalqlar do‘stligi” sanʼat saroyida bo‘lib o‘tgan 20 yillik ijodiy sarhisobida barcha qo‘shiqlarni to‘liq jonli ijroda kuyladi. U nafaqat konsert repertuarini rang-barang qilishga, balki sahna bezagi, imiji va mashhur hamkasblari bilan duet aytishga ham katta ahamiyat qaratdi. Afisha.uz muxbirlari Lolaning shov-shuvli konsertidan video reportaj tayyorladi.
“Dizayn jamoasi 2023-yilgi konserti” | “Dizayn jamoasi”
Oʻzbekistondagi taniqli kulgi jamoalaridan biri — “Dizayn” oʻzining oʻtgan yilgi konsert dasturini YouTube’da e’lon qildi.
X-Faktor 1-soni | 2-mavsum | X Factor Oʻzbekiston
“The X-faktor” — dunyoga eng mashhur iste’dodlar vokal shousi boʻlib, ushbu formatni dunyoning ellikdan ortiq mamlakatlarida oʻtkaziladi. O‘zbekiston ushbu loyihani amalga oshirgan ellik sakkizinchi davlatga aylandi. Mazkur shou dunyo arenasida allaqachon oʻz oʻrnini egallab ulgurgan va yorqin iste’dodlarni kashf etish hamda yangi yulduzlarni ommaga olib chiqish orqali oʻzini mustahkam namoyon eta olgan loyihadir.
Loyihaning ikkinchi mavsumida xonanda Lola va Munisa Rizayeva, reper Shaxriyor va Ibrohim Ahmedovlar hakamlik qiladi.
Podkastlar
“Siz bilmagan Davron Fayziyev | Teacher Azam, Davron Fayziyev, Kunduziy” | Azam Qahramoniy
Teacher Azam nomi ila mashhur boʻlgan ingliz tili mullimi A’zam Qahramoniy oʻzining “NQE” podkastiga sport sharhlovchisi Davron Fayziyevni taklif qildi. Ular ushbu mehmonning oʻzi, kasbi va uning qiyinchiliklari, arab sharhlovchilari va albatta, futbol haqida suhbatlashishgan.
“ENERGETIKA VAZIRI BILAN: BOYSUN FOJIASI, AES, 200 KILOVATT VA H.K.” | “Lolazor podcast”
“Lolazor"chilar bu safar energetika vaziri Joʻrabek Mirzamahmudov bilan qish mavsumiga tayyorgarlik, Boysundagi fojia, AES qurilishi masalasi, suyultirilgan gaz nega qimmatlab ketayotgani, 200 kilovatt chegarasi, mahsulot taqsimlash shartnomalari va boshqa turli mavzularda suhbatlashdi.
“Анна Виленская. Разбор музыки Узбекистана. Классика и современность” | “Tashkent Live Music Session”
Toʻplamimizda rus tilidagi ilk video, ammo bu shu roʻyxatda boʻlishga haqli. Bundan 3 oy oldin rossiyalik mashhur intervyuver Yuriy Dud musiqashunos Anna Vilenskaya bilan suhbat uyushtirgandi. Vilenskaya yaqinda Toshkentga kelib, oʻz sohasi boʻyicha ma’ruza uyushtirdi va “Tashkent Live Music Session” podkastida ishtirok etdi. Ushbu suhbatda oʻzbekistonlik san’atkorlar, xususan, Sevara Nazarxon, Tohir Sodiqov, “Bu Qala” va “Flyin Up” guruhlari musiqalari muhokama qilingan.
Konsta: Xalqimiz birlashishi kerak | “102 tv”
Reper Konsta “102 tv” muallifi bilan turli mavzularda suhbat olib bordi.
Boshqa videolar
“Navbahor 2:3 Andijon Qoʻshimcha boʻlimlar, gollar va xavfli vaziyatlar HIGHLIGHTS” | Sports.uz
Kuni kecha Fargʻonada oʻzbek futboli tarixidagi eng yaxshi uchrashuvlardan biri boʻlib oʻtdi. Vodiy derbisiga aylangan Oʻzbekiston Kubogi finali drama boʻlib ketdi. Uchrashuv yakuniga 10 daqiqa qolganda hisobni tenglashtirgan andijonliklar ekstra taymlar soʻnggida gʻalabani ilib ketdi. Bu oʻyinni (hech boʻlmasa haylaytslarini) koʻrgan yaxshi.
ABDULAZIZ HAKIMOVICH | “URBANIZATSIYA” NOMLI STAND-UP KONSERTI | “Sahna Stand-up”
Yosh va umidli stendap komik Abdulaziz Hakimovich oʻzining yangi va qisqa konsertini taqdim etdi.
Siz yana qanday videolarni tomosha qildingiz? Yana qaysi loyihalarni e’tiborga olishimiz lozim?