Toshkentda yangi turdagi avtobus bekatlari oʻrnatiladi

Yangi turdagi bekatlarni oʻrnatish ishlari shu yilning iyun oyida boshlanadi, deya xabar bermoqda Gazeta.uz hokimlikning taqdimotiga asoslanib.

Avvalroq Toshkent shahar hokimligi avtobus bekatlarining yangi yagona dizayni taqdim etgandi. Uzunligi 3,2 va 6,5 m bo‘lgan metall karkasli, mustahkamlangan shishaga ega avtobus bekatlari yog‘och o‘rindiqlar, ma’lumot tablosi, kuzatuv kamerasi, 112 favqulodda chaqiruv tugmasi va quvvatlantiruvchi qurilmalar bilan jihozlangan.

Platformaning balandligi avtobusga qulay kirish va chiqishga mo‘ljallangan bo‘lishi kerak. Ko‘zi ojizlar uchun taktil plitalar taqdim etiladi, deb xabar berdi shahar hokimligi tarkibiga kiruvchi “Toshkent invest” kompaniyasi.

Hokimlik yangi bekatlarning namunalarini taqdim etgan.

Toshkent hokimligi matbuot xizmatining “Gazeta.uz"ga aniqlik kiritishicha, do‘konlar joylashgan avtobus bekatlari buzilishi rejalashtirilgan. Biroq o‘zgarishlar, birinchi navbatda, do‘konsiz bekatlarga ta’sir qiladi. Ya’ni endi avtobus bekatlari va doʻkonlar bir joyda boʻlmaydi.