Konsta va payme taqdim etadi: tanlov erkinligi haqida musiqiy klip
Konsta va payme tanlov qilish va o‘zini qabul qilish jasoratini ta’kidlovchi “Qorincha” – qaror qabul qilish erkinligi manifestini taqdim etdi.
Vaziyatni tasavvur qilish kerak: uyga elektrik chaqirdingiz. U hamma ishni qilib bo‘lgach, sizning “qancha bo‘ladi?” degan savolingizga shunchaki jilmayib: “Ko‘ngildan chiqarib bering”, dedi.
Hayotda bunday holatlar ko‘p uchraydi. “Ko‘ngildan chiqarib” qancha berish kerakligini bilmasik ayb emas. Tug‘ilib-o‘sgan shaharda adashib qolish yoki yillar davomida mashina minib ham, motor moylarining farqiga bormaslik uyat emas.
Inson bu haqiqatlarni oshkora tan olishdan, noto‘g‘ri tushunishlaridan qo‘rqadi. Lekin Konsta va payme buni gapirishga jur’at topdi va mavzuga bag‘ishlab butun boshli musiqiy klip suratga oldi.
“Qorincha shunchaki kulgi uchun aytilgan qo‘shiq emas. U — kuchli g‘oya, o‘zlikni qabul qilish haqida madhiya, ijtimoiy bosimga qarshi yurish. Zamonaviy dunyoda haqiqatan bosim juda katta. Sening qanday yashashingdan boshlab nima ish qilishinggacha go‘yoki boshqalar nazorat qiladigandek. Bizning maqsadimiz — har bir inson o‘z yo‘lidan yura olishini, birovlarning fikriga qaramay mustaqil qaror qabul qila olishini ko‘rsatish. Haqiqiy ozodlik ham shunda”, — deydi trek muallifi reper Konsta — Sharif.
Klipni suratga olish uchun Lokals agentligi payme bilan hamkorlikda chinakam dadil g‘oya o‘ylab topdi — Konsta ijtimoiy tarmoqlar trendlariga tushib qolib, soniyalar ichida bitta obrazdan ikkinchi obrazga o‘tishi kerak edi. Shu bilan birga, hammasi rils formatidagi vertikal ramka ichida sodir bo‘lishi ko‘zda tutilgandi.
Bu noodatiy g‘oyani Abstract jamoasi va Markaziy Osiyoning iqtidorli rejissyorlaridan biri Adilet Abish katta mahorat bilan amalga oshirdi.
Suratga olish jarayoni 18 soat davom etdi, bu vaqt ichida Konsta 127 ta obrazni namoyish qilib, 22 ta katta sahnada rol ijro etishga ulgurdi. Har bir joy va obraz puxtalik bilan o‘ylab chiqilgan. Hattoki ekranda bir zumda chiqib yo‘q bo‘ladigan izohlar ham saralanib, qo‘lda yozildi. Har bir qatnashchi uchun bu oddiy videorolik emas, balki minglab o‘zbekistonlikni qoʻllab-quvvatlash imkoni edi.
Klipni Instagramda ham tomosha qilish mumkin.
“Avvalambor payme — bu insonlarga bagʻishlangan brend. Odamlar ko‘pincha o‘zlarini noto‘g‘ri ish qilayotgandek sezadi. Ba’zan oddiy ko‘ringan narsalar ham jamiyat tomonidan ayblanishi mumkin. Bunday murakkab dunyoda seni kimdir borligingcha qabul qilishi, qarorlaringni tan olishi juda muhim. Asosiysi, har bir qaroringni o‘zing tan olishing kerak”, — deydi Nodira Shermatova, payme marketing direktori.
Klip tarmoqqa endigina chiqqan bo‘lsa-da,minglab izohlar yig‘ilishga ulgurdi. Qoldirilgan har bir fikr oddiy insonlar tomonidan yozilgani yanada quvonarli — chunki bu klip aynan ular uchun yaratilgan. Siz ham o‘zligingizcha qoling, qarorlarni o‘zingiz qabul qiling. Nimani to‘g‘ri deb hisoblasangiz, o‘sha qaror to‘gʻri bo‘ladi.
Reklama huquqlari asosida.