Navroʻz bayrami kunlari iliq ob-havo kuzatiladi

O‘zbekiston bo‘yicha 20-mart, payshanba kuni quruq va juda iliq ob-havo saqlanib turadi. Kunduz kunlari havo +25…+27 darajagacha, ba’zi joylarda +30 darajagacha isiydi, deya xabar bermoqda O‘zgidromet.

21-martda respublika hududining katta qismida Navro‘z bayrami qulay ob-havo sharoitida o‘tadi, faqat respublika shimolida ba’zi joylarda yomg‘ir yog‘adi. Kunduzgi havo harorati 27−30 daraja iliq atrofida bo‘ladi.

Shanba va yakshanba kunlari respublikaning g‘arbiy hududlariga nam va nisbatan salqin havo massalari kirib kelishi boshlanadi. 22−23 mart kunlari Qoraqalpog‘iston Respublikasi, Xorazm, Buxoro, Navoiy viloyatlarida ba’zi joylarda yomg‘ir yog‘adi. Ayrim tog‘li hududlarda ba’zi joylarda yomg‘ir yog‘adi, baland tog‘larda qorga aylanadi.

Respublikaning qolgan hududlarida quruq ob-havo bo‘lishi kutilmoqda. Ushbu kunlarda havo harorati asta-sekin pasayadi va 22−27 daraja iliqni tashkil etadi. Sharqiy shamol yo‘nalishini o‘zgartirib, g‘arbdan 7−12 m/s tezlikda esadi, ba’zi joylarda 13−18 m/s gacha kuchayadi.

Toshkentda 20−23 mart kunlari yog‘ingarchilik kutilmaydi. Shamol sharqdan 3−8 m/s tezlikda esadi, 21 va 23 martda 10−12 m/s gacha kuchayishi mumkin. Harorat asosan kechalari 12−14 daraja iliq, kunduz kunlari 26−28 daraja iliq bo‘ladi.