Parij musiqa maktabi, SI bo‘yicha xalqaro anjuman, qo‘shma kinoloyihalar – Fransiya va Oʻzbekiston oʻrtasida madaniy bitimlar imzolandi

Prezident Shavkat Mirziyoyevning Parijga davlat tashrifi doirasida O‘zbekiston Madaniyat va san’atni rivojlantirish jamg‘armasi va Fransiya Madaniyat vazirligi o‘rtasida madaniyat sohasida hamkorlik bo‘yicha qator bitimlar imzolandi. Hujjatlarga Jamgʻarma raisi Gayane Umerova va Fransiya madaniyat vaziri Rashida Dati imzo chekdilar.

Bitimlardan biri ikki mamlakat madaniyat muassasalari o‘rtasida hamkorlik to‘g‘risidagi deklaratsiya bo‘ldi. Unda Alfred Korto nomidagi Parij musiqa maktabi va O‘zbekiston davlat konservatoriyasi o‘rtasida akademik almashinuvlarni rivojlantirish va qo‘shma kinoloyihalarni qo‘llab-quvvatlash nazarda tutilgan.

Shuningdek, Fransiyada “O‘zbekiston: sahrodagi avangard” ko‘rgazmasini hamda YUNESKO Bosh konferensiyasining 43-sessiyasi doirasida Samarqandda muzeylar va sun’iy idrok bo‘yicha xalqaro anjumanni o‘tkazish to‘g‘risida bitim ham imzolandi.

Shu bilan birga, jamg‘arma raisi va ALIPH Kengashi raisi Bariza Khiari tomonidan Meros muhofaza qilish xalqaro alyansi (ALIPH) bilan imzolangan bitim qo‘shma restavratsiya loyihalari, merosni saqlashning ilg‘or usullaridan foydalanishga yo‘l ochish imkoniyatlarini nazarda tutadi. Jamg‘arma raisi ALIPH Kengashiga a’zo bo‘ldi.

Fransiya Milliy madaniy meros instituti bilan bitim meros sohasidagi mutaxassislar uchun ta’lim dasturini ishga tushirish va Fransiyada amaliyot o‘tashni tashkil etishni o‘z ichiga oladi.

Jamg‘arma raisi o‘rinbosari va institut direktori Mari Favero tomonidan Fransiyaning Markaziy Osiyo tadqiqotlari instituti bilan imzolangan protokolda noyob kitoblar va qo‘lyozmalarni saqlash bo‘yicha konferensiyalar, ta’lim dasturlari va loyihalarni o‘tkazish nazarda tutilgan.