Toshkent metropolitenida favqulodda chaqiruv tugmalari paydo boʻladi

Toshkent metropolitenida favqulodda chaqiriq tugmalarini o‘rnatish boshlandi. Bu haqda “Toshkent” telekanali “Poytaxt” informatsion dasturida xabar berildi, deya yozmoqda “Gazeta.uz”.

Qayd etilishicha, tugmalar fuqarolarning xavfsizligini ta’minlash, huquqbuzarliklarning oldini olish maqsadida metropoliten hududida oʻrnatilmoqda.

“Fuqarolar ushbu tugmani bosish orqali metropoliten xodimlari bilan bog‘lanib, huquqbuzarlik to‘g‘risida xabar berishi yoki yordam so‘rashi mumkin”, — deya ta’kidladi IIV transport va turizm obyektlarida xavfsizlikni ta’minlash departamenti matbuot kotibi Azamat Axmatov.

Mutasaddining qo‘shimcha qilishicha, metrodagi videkamera va dinamiklar yordamida xodimlar murojaatchi bilan audio-videoaloqa o‘rnatadi. Barcha ma’lumotlar avtomatik ravishda tizimda qayd etiladi. Bu yo‘lovchilarning murojaatlariga tezkor javob qaytarish imkonini beradi.

Xodimlar tomonidan tunu-kun situatsion tahlil markazining metro bekatlariga o‘rnatilgan videokuzatuv kameralari orqali kelib tushayotgan xabarlarni aniqlash, tezkorlik bilan bartaraf etish va shubhali ko‘ringan yo‘lovchilarning xatti-harakatlari kuzatib borilayotgani qayd etilgan.

Avvalroq Toshkent metropolitenining Buyuk Ipak yo‘li bekatida hojatxona hamda onalar va bolalar xonasi ishga tushgandi.