100 ming soʻmga qanday sovgʻalar xarid qilish mumkin?
Koʻpchilik odamlar tomonidan yil davomida eng koʻp kutiladigan bayramlardan biri yaqinlashmoqda. Yangi yil bu moʻjizalar bayrami boʻlib, unda har bir odam oʻz yaqinlariga baxt va quvonch ulashishga harakat qiladi. Bunda ularga har xil sovgʻalar yordamga keladi. Sovgʻaning katta-kichigi boʻlmaydi, shu bilan birga arzon va qimmati ham.
Afisha.uz ushbu toʻplamda 100 000 soʻmgacha narxda xarid qilish imkoni boʻlgan har xil sovgʻalarni bir yerga jamladi.
Darts
Odam chalg‘ish uchun har xil o‘yinlar o‘ynagisi keladi, xarid qilishga erinadi yoki esdan chiqadi. Siz bu bayramda yaqin insoningizni ushbu darts o‘yini bilan xursand qilishingiz mumkin. Darts narxi 65 000 ming so‘mni tashkil qiladi.
Gantellar
Yangi yil bayrami har xil foydali mashgʻulotlarni boshlashning ayni vaqti hisoblanadi. Shuningdek, yangi yil dasturxonidan keyin har xil jismoniy harakatlarga ehtiyoj ortadi. Albatta, bunday vaqtda birdan ogʻir mashgʻulotlarni boshlash motivatsiyaning tushib ketishiga sabab boʻladi. Shu sababdan yengilroq vazndagi gantellarni sovgʻa qilish ayni muddao. Bir kilogramm vazndagi gantel narxi 69 000 soʻmni tashkil qiladi.
Xushboʻy shamlar
Barcha narsadan ham koʻra xushboʻylikni yoqtiradigan odamlar uchun hozirda modaga aylangan xushboy shamlarni sovgʻa qilish mumkin. Bu mahsulotning har xil turlarini, xususan, kofe, gullar, okean, sitrus mevalar hidlarini tarqatadigan shamlarni topish mumkin. Ularning narxlari ham har xil boʻlib, 29 000 soʻmdan boshlanadi.
Kitoblar
Har qanday bayramda kitoblar o‘zgarmas va eng foydali sovg‘alardan biri boʻladi. Siz sovg‘a qilmoqchi bo‘lgan insonni qiziqishlarini va oxirgi o‘qiyotgan kitobini bilsangiz, uni ham hisobga olib yangi kitob (lar) tanlashingiz mumkin. Ammo yangi yil bayrami munosabati bilan sovgʻa olayotganingizni hisobga olsak, Garri Potter haqidagi kitoblardan biri ayni muddao boʻladi. Kitob narxi 35 000 soʻmni tashkil qiladi.
Konsertga chipta
Yaqinlaringiz madaniy hordiq chiqarishini istasangiz, ularga biror konsert uchun chipta sovg‘a qiling. Yangi yil bayrami arafasida bir qator gala-konsertlar oʻtkaziladi. Bu chipta sovgʻa qilayotgan odamingiz sevimli xonandasining ijodidan bahramand boʻlish imkoniyatini oshiradi. “Harry Potter and wizards” saundtreklar konserti, “Filarmoniya shou” gala-konserti, “Tarona shou” yangi yil gala konserti, “Yangi yil simfoniyasi” konserti, “Yangi yil shousi” gala-konserti, “Sahar” guruhi konserti — bular yaqin orada bo‘lib o‘tadigan tadbirlar. Agar siz sovg‘a beruvchi odamga bu variantlar to‘g‘ri kelmasa, Afisha.uz'ning Konsertlar bo‘limidan yoki Iticket.uz saytidan boshqa konsertlarni topishingiz mumkin.
Qoʻl soatlari
Klassik uslublarni sevuvchilar uchun bemalol qoʻl soatlarini sovgʻa qilish mumkin. Shuningdek, klassik soatlar narxi 49 000 soʻmdan boshlansa, smart soatlar 99 000 soʻmni tashkil qiladi. Bundan tashqari, 100 000 soʻmgacha boʻlgan soatlarning har xil narxdagi va turdagisini topishingiz mumkin.
Stol oʻyinlari
Agar siz katta kompaniya yoki oilangiz uchun sovgʻa tanlayotgan boʻlsangiz, stol oʻyinlari, xususan, uno, mafiya va boshqalar oʻrin olgan toʻplamni xarid qilishingiz mumkin. Ushbu sovgʻa kelayotgan dam olish kunlarini maroqli oʻtkazishda ham yordam beradi.
Oʻyinlar narxi 24 000 soʻmdan boshlanadi.
Hamyon yoki kardxolder
Agar sovgʻa sifatida nima xarid qilishni bilmasangiz ushbu variant aynan siz uchun. Baxt oddiylikda degan qarashni qoʻllab-quvvatlab, doʻstingizga / juftingizga / hamkasbingizga hamyon yoki kardxolder sovgʻa qilishingiz mumkin. Toʻgʻri, bu kichik narsadek koʻrinadi, lekin shu bilan birga juda muhim ham hisoblanadi. Klassik hamyon narxi 54 000 soʻmni tashkil qilsa, kardxolderlar narxi 27 000 soʻmdan boshlanadi.
Kоpilka
Yangi yilda koʻproq pul yigʻishni xohlayotgan tanishingizga sovgʻa olmoqchi boʻlsangiz, unda ushbu “Maqsad uchun” kopilkasi sizga yordamga keladi. Agar bu mahsulotni xarid qilsangiz marker ham sovgʻaga beriladi. Kopilkaning narxi 66 000 soʻmni tashkil qiladi.
Ultrafioletli chiroq
Detektiv asarlar oʻqishga yoki shu janrdagi filmlarni tomosha qilishga qiziqadigan doʻstlaringizni hayron qoldirishning oson yoʻli mavjud. Unga koʻrayotgan filmlarida koʻp bora guvohi boʻladigan ultrafioletli chiroq sovgʻa qiling. Albatta, sovgʻa qilayotgan insoningiz buni ishlatishga majbur boʻlmasligini, ammo original sovgʻadan zavq olishini tilaymiz. Ushbu mahsulot narxi 80 000 soʻmni tashkil qiladi.
Termosumka
Afisha.uz saytidagi oʻzbek tahririyati muharrirlarining deyarli 70 foizi tushlik uchun uyidan ovqat olib keladi. Shu sababdan sovgʻa uchun termosumka variantini bu roʻyxatga qoʻshmaslik adolatdan boʻlmasdi. Qulay termosumkada taomlarni issiq holda saqlash mumkin. Ushbu mahsulot narxi 63 000 soʻmni tashkil qiladi.
Yangi yilni moʻjizalar bayrami ham deya atashadi. Moʻjizalar esa odatda kichik narsalarda yashiringan boʻladi. Bu bayramda doʻstlaringiz / hamkasblaringiz / juftingizga sovgʻa berish va ularning kayfiyatini koʻtarish orqali kichik moʻjizaning yaratilishiga katta hissa qoʻshgan boʻlasiz. Unutmang, sovgʻadan koʻra koʻproq e’tibor muhimroqdir!
