Kichik halqa avtomobil yoʻlining yana ikki qismi vaqtincha yopiladi
19-sentyabr kuni soat 20:00 dan 23:00 gacha Olmazor tumanidagi yoʻl avtomobillar harakati uchun yopiladi. Bu haqda Toshkent shahar hokimligi matbout xizmati xabar berdi.
Qayd etilishicha, tumandagi Kichik halqa avtomobil yoʻlining Shimoliy Olmazor koʻchasidan Usta Olim koʻchasi bilan kesishmasigacha boʻlgan qismida drenaj quvurlarini ta’mirlash ishlari olib boriladi.
Bundan tashqari, yoʻl ta’mirlash ishlari sababli Kichik halqa avtomobil yoʻlining Qorasaroy koʻchasi bilan kesishmasidan Usta Olim koʻchasigacha boʻlgan qismi 19-sentyabr kuni soat 23:00 dan 20-sentyabr kuni 07:00 gacha avtomobillar harakati uchun yopiladi.
Avvalroq Oʻzbekistonda boʻlib oʻtayotgan futzal boʻyicha Jahon chempionati sababli Humo Arena yaqindagi koʻchalarda mashinalar harakati vaqti-vaqti bilan cheklanishi haqida xabar berilgandi. Shuningdek, Kichik halqa avtomobil yoʻlining Shimoliy Olmazor koʻchasi bilan kesishmasidan Qorasaroy koʻchasigacha boʻlgan qismida yoʻl ta’mirlash ishlari olib borilishi ma’lum qilingandi.