Oʻzbekistonda hafta davomida issiq havo saqlanib turadi

Dushanba va seshanba O‘zbekiston hududi bo‘yicha havo haroratining biroz pasayishi kutilmoqda, deya xabar berdi O‘zgidromet agentligi.

Toshkent shahrida havo kam bulutli bo‘ladi, yog‘ingarchilik kutilmaydi. Shamol sharqdan 3−8 metr/sekund tezlikda esadi, ba’zi joylarda 10−12 metr/sekundgacha kuchayadi. Harorat asosan kechalari +22…+25, kunduz kunlari 29−30-iyulda +36…+38, 31-iyul va 1−2-avgustda +38…+41 daraja bo‘ladi.

Kunduzgi havo harorati +34…+38 daraja atrofida, faqat janubda ba’zi joylarda +41…+44 darajagacha bo‘ladi.

Ish haftasining o‘rtasidan oxirigacha harorat foni 2−3 darajaga ko‘tariladi. Hududning katta qismida kunduz kunlari havo +39…+41 darajagacha isiydi.

Shamol 7−12 metr/sekund tezlikda esadi, ba’zi joylarda 13−18 metr/sekundgacha kuchayadi, 29−31-iyulda cho‘l hududlarda ba’zida 20−23 metr/sekundgacha kuchayishi, chang-to‘zonlar bilan kuzatilishi mumkin.