Toshkentda “Hotel Business Forum” o‘tkaziladi

29-fevral-1-mart kunlari Toshkent shahrida mehmonxona sanoatiga oid tadbir — “Hotel Business Forum” o‘tkaziladi. Bu haqda Turizm qo‘mitasi matbuot xizmati xabar bermoqda.

Xalqaro tadbir Inter Continental Tashkent mehmonxonasida o‘tkaziladi. Forum innovatsion konsepsiyalarni ishlab chiqish va amalga oshirish, ularni rejalashtirishdan boshlab bozorgacha muvaffaqiyatli biznesga aylantirishga qaratilgan.

Bundan tashqari, yashil texnologiyalar, franshiza sarmoya daromadlari, axborot texnologiyalarining o‘rni, ekologik jihatlar, mehmonxona biznesida xizmatlarni raqamlashtirish kabi masalalarni yoritish rejalashtirilgan.

Shuningdek, tadbir doirasida mehmonxona sanoatidagi eng yaxshilarni aniqlash va mamlakatning turistik jozibadorligini oshirishga qaratilgan O‘zbekiston Milliy mehmondo‘stlik mukofotini topshirish marosimi ham o‘tkazilishi qayd etilgan.

“O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi huzuridagi Turizm qo‘mitasi hamda Otelerlar assotsiatsiyasi ko‘magida o‘tkaziladigan makzur tadbir mehmonxona sanoatidagi muhim voqea, kompaniya va yetakchi ekspertlar uchun muloqot va tajriba almashish maydoni bo‘ladi”, deyiladi xabarda.