Tarixda birinchisi: UNWTO Bosh Assambleyasi sessiyasi O‘zbekistonda o‘tkaziladi
16 — 20-oktyabr kunlari Samarqand shahrida Birlashgan Millatlar Tashkilotining Butunjahon Turizm Tashkiloti (UNWTO) Bosh Assambleyasining 25-yubiley sessiyasi o‘tkazilishi kutilmoqda.
O‘zbekiston o‘z tarixida birinchi marta BMT oilasiga kiruvchi tashkilotning eng muhim tadbiri hisoblangan va ikki yilda bir marta o‘tkaziladigan Bosh assambleyaga mezbonlik qiladi.
Tadbir 160 ga yaqin davlatdan turizm yo‘nalishida faoliyat yurituvchi davlat idoralari rahbarlari, xalqaro tashkilotlar va turistik biznes vakillarini birlashtiradi.
Sessiya doirasida Saudiya Arabistoni, Albaniya, Ozarbayjon, Bagama, Baxreyn, Gvatemala, Gaiti, KotDivuar, Indoneziya, Monako, Niger, Panama, Portugaliya, Siyerra Lione, Ukraina, Urugvay, Yaman kabi mamlakatlarning turizm idoralari rahbarlari Samarqandga kelishi kutilmoqda.
O‘zbekiston keyingi 2023−2027-yillar uchun UNWTO Ijroya kengashining Vakolatlar bo‘yicha qo‘mitasi aʼzoligiga qabul qilindi. Bu UNWTO Ijroiya kengashi tomonidan qabul qilinadigan muhim qaror va hujjatlar, ularda aʼzo davlatlar ishtirokining haqqoniyligi va tamoyillarga mosligini nazorat qilish vakolati O‘zbekistonga ishonib topshirilganini bildiradi.
Ta’kidlanishicha, bu O‘zbekistonning nafaqat jahon turizm bozoridagi pozitsiyasi mustahkamligini, balki xalqaro munosabatlardagi faoliyatining ham nechog‘li samarali ekanini namoyon qiladi.
Qayd etilishicha, Bosh Assambleyaning O‘zbekistonda o‘tkazilishi mamlakatning xalqaro maydondagi nufuzini oshirish, xalqaro tashkilotlar bilan hamkorlik ko‘lamini yanada kengaytirish, madaniy va turizm salohiyatini targ‘ib qilishda yangi imkoniyatlarni taqdim etadi.
Bosh Assambleyaning 25-sessiyasi doirasida turizm sohasidagi xalqaro hamkorlik masalalari yalpi sessiyalar va boshqa qator keng miqyosli anjumanlarda muhokama qilinadi.
Jumladan UNWTO doirasida tashkillashtirilishi rejalashtirilayotgan Investitsiya forumi O‘zbekistonning barcha hududlaridagi investitsiyaviy salohiyati yuqori bo‘lgan obyektlar, hududlar, loyihalar yirik xorijiy investorlarga taqdim etilishi, O‘zbeksitonga faol maqsadli va manzilli investitsiyalar jalb etilishi bo‘yicha ko‘plab muhim biznes kelishuvlariga erishilishi ko‘zda tutilmoqda. Forum turizm sektoridagi imkoniyatlarni o‘rganish uchun global manfaatdor tomonlarni, sanoat rahbarlarini va investorlarni birlashtiradi hamda mamlakatda yaratilgan qulay investitsion muhit hamda xorijiy investitsiyalarni jalb etishning mustahkam huquqiy asoslarini namoyish etish, shuningdek ishtirokchilar o‘rtasidagi hamkorlikni rivojlantirishga qaratilgan.
Investforumdagi asosiy sessiyalar davomida O‘zbekistonning sarmoyaviy muhiti haqida jahon jamoatchiligida ijobiy fikrni shakllantirish, yirik xorijiy investorlarda mamlakatga sarmoya kiritishga qiziqishni oshirish maqsadi ko‘zlangan. Tadbir yakuniga ko‘ra, mamlakatga kiritiladigan investitsiyalar ko‘lamini oshirish orqali barqaror rivojlanishga ko‘maklashish, yurtimizning sarmoyaviy salohiyatini yanada oshirish va global miqyosda sektorlar bo‘ylab hamkorlikni kuchaytirishga erishish kutilmoqda.
Shu bilan birga, O‘zbekistonning boy madaniy merosi va tabiiy resurslarini saqlab qolgan holda, mamlkatimizning iqtisodiy o‘sishiga hissa qo‘shadigan investitsiyalarni jalb qilish ko‘zlanmoqda.
Bosh Assambleya doirasida o‘tkazilishi kutilayotgan Taʼlim forumi turizm sohasidagi taʼlimning bugungi kundagi holatini namoyon etish, malaka oshirish va barcha uchun inklyuziv imkoniyatlar yaratishga sarmoya kiritish naqadar muhim ekanini namoyon qiladi.
Tadbirda UNWTO tomonidan o‘rta, oliy va boshqaruvchi taʼlim bo‘yicha yetakchi akademik hamkorlar bilan ishlab chiqilgan qo‘shimcha tashabbuslar, innovatsion taʼlim vositalari to‘plami, Xalqaro barqaror turizm bo‘yicha yangi fanlar bo‘yicha o‘qitish har bir sohadagi so‘nggi yutuqlar namoyish etiladi. Forumning keng qamrovli dasturi manfaatdor tomonlar, siyosatchilar, professorlar va sanoat rahbarlarini jamoaviy harakatlarga ilhomlantirish va safarbar etishga intiladi.
Bundan tashqari, tadbir doirasida UNWTO tomonidan yilning eng yaxshi sayyohlik qishloqlari (Best Tourism Villages) eʼlon qilinadi.
Buning uchun hududning iqtisodiy, ijtimoiy va ekologik jihatdan barqarorligini taʼminlashga qaratilgan, aholining anʼanaviy hayot tarzi va qadriyatlarini saqlab qolgan holda, taraqqiyot va farovonlikni taʼminlaydigan ilg‘or turizm sohalariga ega butun dunyodagi turizm qishloqlari tanlab olinadi.
Butunjahon Turizm Tashkiloti (YUNVTO) Bosh Assambleyasi 25-yubiley sessiyasining Samarqand shahrida o‘tkazilishi mamlakatning madaniy, turizm, investitsiya va intellektual salohiyatini dunyoga tanitishi barobarida, jahon hamjamiyati bilan olib boriladigan savdo-iqtisodiy, turizm va madaniy sohalardagi xalqaro aloqalarining yanada mustahkalanishi yo‘lida xizmat qilishi qayd etilgan.