Barchasi "Garri Potter" seriali haqida: ijodkorlar, kasting va boshqa mish-mishlar
2025-yil fevral oyida amerikalik aktyor Jon Litgou “Garri Potter” serialida Albus Dambldor rolini o‘ynashini tasdiqladi. Bu kastingning rasman e’lon qilingan birinchi qarori boʻldi. “Kinopoisk” HBO kinokompaniyasining shov-shuvli loyihasi haqida barcha ma’lumotni bir yerga toʻpladi.
Afisha.uz esa serial haqidagi ma’lumotlarni oʻzbek tilida (toʻldirilgan holda) taqdim etadi. Quyida serialning taxminiy premyera sanasidan tortib, aktyorlar jamoasi va ular atrofidagi mish-mishlargacha soʻz boradi.
Garri Potter haqidagi muvaffaqiyatli filmlar, “Fantastik maxluqlar” trilogiyasi, “Garri Potter va la’natlangan bolalar” spektakli va “Hogwarts Legacy” video o‘yinlari chiqqanidan so‘ng navbat serialga ham yetib keldi. Buning ustida ish boshlangani rasman 2023-yil 12-aprelda Max striming xizmati (sobiq HBO Max) tomonidan tasdiqlandi. Bo‘lajak serial kinofranshizaning vizual uslubini saqlab qoladimi yoki o‘z yo‘lidan ketadimi, hozircha noma’lum. Ammo bir narsani aniq aytish mumkin: loyiha kitoblarning eng keng ko‘lamli ekranizatsiyasi bo‘lishga va’da bermoqda.
Yangi “Garri Potter” seriali filmlardan nimasi bilan farq qiladi?
Serial Joan Roulingning barcha yettita kitobidagi voqealarga asoslanadi, ularning har biri alohida mavsum boʻladi. Rasmiy bayonotda Max shouni “o‘n yillik loyiha” deb ta’riflab, muxlislar sehrli dunyoga uzoq vaqt davomida sho‘ng‘ishini va’da qilmoqda. Filmlardan asosiy farqi qahramonlarning kanonik yoshiga qaytish bo‘ladi. Masalan, 1991-yilda, turkumning birinchi kitobi “Garri Potter va falsafa toshi” voqealari sodir bo‘lganida, Severus Sneyp 31 yoshda boʻlgan. Demak, uni tegishli yoshdagi aktyor o‘ynaydi. Ma’lumot uchun, franshizaning birinchi filmini suratga olish paytida Alan Rikman 54 yoshda boʻlgan.
Muxlislarni yangi aktyorlar tarkibi va “Garri Potter” kitoblariga sayohat kutmoqda. Roulingning ta’kidlashicha, serial cheklangan limit tufayli filmlarga kirmay qolgan syujet chiziqlari va tafsilotlarini ochib beradi. Ijodkorlar kitoblarga sodiq qolishga va’da berish bilan birga, ilgari ko‘rsatilmagan, masalan, o‘qituvchilar uchun mo‘ljallangan lokatsiyalarni qo‘shgan holda, Hogvartsni yangicha ko‘rinishda taqdim etmoqchi. Shuningdek, yangi serialda Hogvarts poltergeystlaridan biri — Pivz paydo bo‘lishi aniq.
“Hogwarts Legacy” oʻyini bilan bogʻliqlik
Warner Bros. prezidenti Devid Heddad (u tez orada oʻz lavozimidan ketadi) “Hogwarts Legacy” video o‘yini yaratuvchilari o‘z ishini serial ijodkorlari bilan muvofiqlashtirayotganini ma’lum qildi. O‘yin va serial hikoyaning umumiy elementlariga ega bo‘ladi. Ular qanday bo‘lishi hali noma’lum, chunki “Hogwarts Legacy 2” oʻyinining syujeti va qahramonlari hali ma’lum qilinmagan. Birinchi oʻyin voqealari Garri tug‘ilishidan ancha oldin, XIX asrda sodir bo‘ladi.
Serialni kim suratga oladi?
Soʻnggi yillarda Joan Rouling bilan boʻlgan ko‘plab mojarolarga qaramay, yozuvchining o‘zi ijrochi prodyuser sifatida ishlaydi. U Max kompaniyasi kitoblardagi voqealar originalligini saqlashga bo‘lgan intilishini qoʻllab-quvvatlashini aytdi. Shuningdek, loyiha prodyuserlari Nil Bler, Rut Kenli-Lets va filmlar franshizasi ustida ishlagan Devid Xeymen boʻladi.
Shouranner sifatida HBO kinokompaniyasining “Succession” va “His Dark Materials” loyihalari bilan tanilgan Francheska Gardiner tayinlangan, ssenariyga esa avvalroq “Killing Eve” serialida ishlagan Laura Nil mas’ul bo‘lgan. “Game of Thrones” va “Succession” seriallarining ba’zi epizodlarini suratga olgan rejissor Mark Maylod “Garri Potter"da ham ishlaydi. Ta’kidlanishicha, serial tomoshabinlarga hikoyaning kadr ortida qolib ketgan tomonlarini taqdim etadi. Rejissyor esa Xogvartsning tub-tubiga sho‘ng‘ib, uni yanada jonliroq koʻrsatishni istayotganini aytmoqda.
Shuningdek, ma’lum boʻlishicha, “Garri Potter"ning vizual dizayni ustida liboslar bo‘yicha rassom Holli Uoddington ishlaydi, u Yorgos Lantimosning “Poor Things” filmidagi ishi uchun Oskar mukofotini qo‘lga kiritgan.
Aktyorlar tarkibi
Shuni ta’kidlash kerakki, kinokompaniya hozircha birorta ham aktyorni rasman tasdiqlamagan. Hatto rol taklifini qabul qilganini e’lon qilgan ehtimoliy nomzodlar ham HBO bilan shartnoma imzolamagan.
Uchta asosiy rolga (Garri, Ron va Germiona) da’vogarlar 2024-yil boshida e’lon qilingan britaniyalik va irlandiyalik aktyorlar uchun ochiq kasting doirasida sinovdan o‘tmoqda (shunga o‘xshash keng ko‘lamli kasting o‘z vaqtida kinofilmlar uchun ham o‘tkazilgan).
Mark Maylod va Francheski Gardinerning so‘zlariga ko‘ra, bosh rollar uchun 30 mingdan ortiq odam ariza topshirgan.
Yangi aktyor va aktrisalar qidirilayotganiga qaramay, muxlislar yangi nomzodlarni allaqachon mashhurlikka erishgan yosh ijodkorlar orasidan faol qidirmoqda. Bosh rolga da’vogarlar orasida Garri Potter — Tobi Vulf (“Pistol” seriali yulduzi), Germiona Grenjer — Bronte Karmaykl (“Christopher Robin”) va Ron Uizli — Joshua Pikering (“A Discovery of Witches”) bor. Ammo bu nomzodlar ehtimoldan yiroq, chunki suratga olish ishlari boshlanishi kerak bo‘lgan 2025-yilning yoziga kelib, ular mos ravishda 17, 19 va 18 yoshda bo‘ladi.
Studiya katta yoshli qahramonlar roliga esa birinchi navbatda o‘zini ko‘rsatgan yulduzlarni ko‘rib chiqmoqda.
Dambldor
Hogvarts maktabi direktori roliga Mark Raylens (“Bridge of Spies”), Mark Strong (“Kingsman: Secret Service”) va Jon Litgou (“Conclave”) asosiy nomzodlar sifatida koʻrsatilgandi. Muzokaralarning yakuniy bosqichiga Litgou 2025-yil fevral oyida yetib keldi. Keyinchalik u rol taklifini qabul qilganini tasdiqladi. Litgouning so‘zlariga ko‘ra, bunday uzoq muddatli loyihada suratga tushish uning hayotidagi so‘nggisi bo‘lishi mumkin. Hozir aktyor 79 yoshda, suratga olish ishlari tugaganida esa 89 yoshda bo‘ladi. Agar hammasi joyida bo‘lsa, amerikalik Litgou Dambldor rolini o‘ynagan birinchi irlandiyalik yoki britaniyalik bo‘lmagan aktyorga aylanadi (Richard Harris, Maykl Gambon va Jud Loudan keyin). HBO hozircha kelishuvni rasman tasdiqlamadi, bu esa muhokamalar uchun oʻrin qoldirmoqda.
Voldemort / Kvirrel
Insayder DanielRPK ma’lumotlariga ko‘ra, HBO va Warner Bros. Oskar mukofoti sovrindori Killian Myorfini professor Kvirrel roli uchun ko‘rib chiqmoqda. Biroq muxlislar aktyor bemalol Voldemort rolini ham o‘ynashi mumkinligiga ishonmoqda. Bundan tashqari, filmlarda Yovuz Lord rolini ajoyib tarzda ijro etgan Reyf Faynsning o‘zi intervyularidan birida bu tanlovni qo‘llab-quvvatladi.
Severus Sneyp
“I May Destroy You” filmi yulduzi Paapa Essedu Severus Sneyp roli uchun muzokaralar olib bormoqda. Essedu Severusni gavdalantirishi Alan Rikman bilan boʻladigan ehtimoliy taqqoslashdan qochishga intilish boʻlishi mumkin. Chunki yosh jihatdan ham, boshqa jihatlardan ham ular bir-biridan ancha farq qiladi. Albatta, ko‘plab ashaddiy muxlislar kastingdagi holatlardan norozi boʻlmoqda. Ayni damda Esseduning Sneyp roliga da’vo qilishi borasida aniqlik yo‘q.
Hagrid
So‘nggi insaydlarga ko‘ra, Hogvarts oʻrmonchisi rolini va “Hot Fuzzy” filmi yulduzi komik aktyor Nik Frost ijro etadi. Avvalroq rolga da’vogarlardan biri “Ted Lasso” serialida Roy Kent roli bilan tanilgan Brett Goldstin edi.
Sirius Blek
Garrining cho‘qintirgan otasi roliga ehtimoliy nomzodlar orasida Ben Barns eng ko‘p tilga olinmoqda. “Narniya xronikasi” filmi yulduzi US Magazine nashriga bergan intervyusida mish-mishlarga izoh berib, agar unga rol taklif qilinsa, uni jiddiy ko‘rib chiqishini aytdi. Ammo hozircha hech kim u bilan bu mavzuda bog‘lanmagan.
Petunya Darsli
Taxminlardan biriga ko‘ra, HBO Fibi Uoller-Bridjga Garrining xolasi Petunya Darsli rolini o‘ynashni taklif qilgan. Aktrisa “Fleabag” serialidagi bosh rolni yaratish va ijro etish orqali mashhurlikka erishgan. Ko‘pchilik Uoller-Bridjning filmlarda Petunya rolini oʻynagan Fiona Shou bilan o‘xshashligini va bu obrazni Petuniyning o‘ziga xos istehzosi bilan o‘ynay olishini ta’kidlamoqda.
Professor Makgonagal
Avvalroq professor Minerva Makgonagall roli uchun nomzodlar orasida “Catastrophe” seriali bilan tanilgan ssenariy muallifi va aktrisa Sheron Horgan, shuningdek, Oskar mukofoti sovrindori Reychel Vays bor edi. Yaqinda bu rolni Oskar va Emmi mukofotiga nomzod boʻlgan Janet Maktir (“Into The Storm”) o‘ynashi mumkinligi ma’lum bo‘ldi. Hozir u muzokaralar olib bormoqda.
Lyutsius Malfoy
Filmlarda Drako Malfoyning otasi rolini ijro etgan Jeyson Ayzeks intervyulardan birida Lyutsius Malfoy rolini aktrisa Meril Strip oʻynay olishini bildirdi. Kinokompaniya ham, aktrisa ham bunga hech qanday munosabat bildirmadi.
Filmlar franshizasi aktyorlaridan kimdir serialda ham rol oʻynaydimi?
Deniel Redkliff franshizaga qaytishni rejalashtirmayotganini aytdi, biroq loyihaga muvaffaqiyat tiladi. Uning ta’kidlashicha, HBO “yangi sahifadan” boshlashni istaydi va jarayonga aralashmaslik to‘g‘ri bo‘ladi.
Muxlislar Tom Felton filmlardagi qahramonining otasi Lyutsius Malfoy rolini o‘ynashi mumkinligiga umid qilmoqda. Ammo studiya mutlaqo yangi aktyorlar tarkibini yigʻishni rejalashtirgan. Shu tufayli bu ehtimoldan ancha yiroq. Shunga qaramasdan, filmlarda rol oʻynagan aktyorlarning serialda ham ishtirok etishini butunlay istisno qilib bo‘lmaydi, balki kutilmagan kameolar boʻlishi mumkin.
Suratga olish ishlari qachon va qayerda boshlanadi?
Film ilgari “Garri Potter” filmlari yaratilgan Warner Bros. Studios Leavesden studiyasida suratga olinadi. Jarayonning boshlanishi 2025-yil yoz o‘rtalariga rejalashtirilgan, premyera esa 2027-yilda bo‘lib o‘tishi kutilmoqda. Dastlab, serial 2026-yilda chiqarilishi kerak edi, ammo kechiktirildi. Ehtimol, bunda ssenaristlarning Gollivuddagi ish tashlashi o‘z rolini o‘ynagan boʻlishi mumkin.
