"Oʻtkan kunlar", "Shum bola", "Baron": Yoqub Ahmedov ijrosidagi e'tiborga molik rollar
Kino va teatr aktyori Yoqub Ahmedov oʻzining turfa xil rollari bilan koʻplab muxlislar mehrini qozongan. Oʻzbekiston Xalq artisti 1938-yilning 3-yanvar sanasida Namangan viloyatida tugʻilgan. Aktyor bugun 87 yoshga toʻldi.
Afisha.uz ushbu maqolada Yoqub Ahmedovning e’tiborga molik rollari haqida ma’lumot beradi.
“Furqat” (1959)
1959-yilda “O‘zbekfilm” kinostudiyasida taniqli rejissyor Yo‘ldosh A’zamov tomonidan shoir Furqatning hayoti haqida hikoya qiluvchi film suratga olinadi. Ssenariy Turob To‘la va Y.Melkumov tomonidan yozilgan. Kinokartinada sovet davriga xos bo‘lgan barcha ideologiyalar koʻzga tashlanadi. FIlmda Furqat obrazini Yoqub Ahmedov gavdalantiradi.
Bundan tashqari, kinokartinada rollarni Hamza Umarov, Razzoq Hamrayev, Obid Jalilov, Joʻra Tojiyev va bir qator rossiyalik aktyor hamda aktrisalar ijro etgan.
“Oʻtkan kunlar” (1969)
Yoqub Ahmedov Abdulla Qodiriyning “Oʻtkan kunlar” asari asosida suratga olingan ikkala filmda ham rol ijro etgan. Dastlab aktyor 1969-yildagi kinokartinada Toshkent hokimi Azizbek rolini ijro etadi.
Kinokartinada xonliklar davri bir muhabbat qissasi orqali tasvirlanadi. Unda margʻilonlik Kumushni sevib qolgan toshkentlik Otabek hayotida boʻlib oʻtgan voqealar hikoya qilinadi.
“Shum bola” (1977)
Gʻofur Gʻulom qalamiga mansub “Shum bola” asari 1977-yilda ekranlarga koʻchgan. Kinokartina rejissyori Damir Salimov, ssenariy mualliflari Shuhrat Abbasov va Aleksandr Naumov hisoblanadi.
Ushbu filmda Yoqub Ahmedov epizodik rolda koʻrinish bergan boʻlsa-da, shum bola personaji bilan boʻladigan “Kimsan? Oʻzing kimsan?” dialogi orqali koʻpchilikning yodida qolib ketgan.
“Alibobo va qirq qaroqchi” (1979)
“Alibobo va qirq qaroqchi” filmi Oʻzbekiston va Hindiston kinoijodkorlari hamkorligida suratga olingan. Unga hindistonlik Umesh Mehra va oʻzbekistonlik Latif Fayziyev rejissyorlik qilgan.
Filmda Yoqub Ahmedov Aliboboning akalaridan biri boʻlgan Qosim personajini gavdalantiradi.
“Oʻtkan kunlar” (1997)
Mustaqillik yillarida suratga olingan yangi “Oʻtkan kunlar” filmida ham Yoqub Ahmedovni koʻrish mumkin. Bu safar aktyor Otabekning otasi — Yusufbek hoji rolida koʻrinish beradi.
Shuningdek, yangi talqinda Otabek rolini Bekzod Muhammadkarimov oʻynagan. Kumush obrazini esa Shahrizoda Dilmorodova gavdalantirgan.
“Koʻrgim keladi” (2014)
Insoniylik, mehr-muruvvat, saxovat, sabr-bardosh, bagʻrikenglik, ayolga hurmat va ehtirom koʻrsatish kabi olijanob tuygʻular haqida hikoya qiluvchi ushbu film rejissyori Javohir Qosimov hisoblanadi. Kinokartinaga ssenariyni esa dramaturg Murod Muhammad Doʻst yozgan.
Asosiy rollarni Yoqub Ahmedovdan tashqari, Dilnoza Kubayeva, Sayyora Yunusova, Husan Joʻraev, Mubina Nazirboyeva, Behzod Muhammadkarimov, Oʻtkir Muhammadxoʻjayev, Malika Ibrohimovalar oʻynagan.
“Baron” (2019)
Yoqub Ahmedov zamonaviy oʻzbek kinolarida ham e’tiborga molik rollarni ijro etgan. Jumladan, Rustam Sagʻdiyevning “Baron” kinokartinasida Izzatning (Farxod Mahmudov) dadasi rolini ijro etgan.
Boks boʻyicha chempion Botir, xotinini haqorat qilgan odamlarlar bilan jangdan soʻng, qamoqqa tushadi. Uni qutqarish uchun rafiqasi giyohvand moddalar sotuvchisi bilan shartnoma tuzadi. Bu esa uning hayotiga zomin boʻladi. Botir esa narkotik “imperiyasi"ga chek qoʻyish uchun maxsus xizmatlar safiga qoʻshiladi.
Seriallar
“Shaytanat”
Tohir Malik asari asosida suratga olingan mashhur oʻzbek seriallaridan biri “Shaytanat"da ham Yoqub Ahmedov rol ijro etgan. U serialda tarixchi olim Xolid rolida koʻrinish beradi.
“Charxpalak”
Umuman olganda 2000-yillarda oʻzbek serialchiligi katta oʻsishga erishgan deyish mumkin. Yoqub Ahmedov “Shaytanat"dan soʻng yana bir mashhur oʻzbek seriali “Charxpalak"da ham Fatxulla obrazida rol ijro etadi.
“Sardor”
Yoqub Ahmedov 2000-yilda premyera qilingan “Sardor” serialida ham suratga tushgan. Oʻzbekiston Xalq artisti serialda generallardan birining obrazida namoyon boʻladi.
