"Uch qahramon" filmi qachon premyera qilinishi ma'lum boʻldi

Kinematografiya agentligi hamda Jamoat xavfsizligi departamenti hamkorligida suratga olingan “Uch qahramon” filmi 1-dekabr kuni premyera qilinadi. Bu haqda kinokartina rejissyori filmga bagʻishlangan press-konferensiyada xabar berdi.

8-noyabr kuni “Renessans” kino uyida “Uch qahramon” filmiga bagʻishlangan press-konferensiya boʻlib oʻtdi. Unda Kinokartina rejissyori va ssenariy muallifi Shohrux Rasulov, bosh rollardan biri ijrochisi Ulugʻbek Qodirov hamda kinoning bir qator ijodiy jamoasi ishtirok etdi.

Bosh rollarni o‘zbekistonlik taniqli aktyor Ulug‘bek Qodirovdan tashqari Shohrux Hamdamov va Sirojiddin Sattorov, shuningdek, qozog‘istonlik aktyor Tauekel Musilim ijro etgan.

Konferensiya davomida “Uch qahramon” filmining ikkinchi katta treyleri namoyish etildi. Shuningdek, kinokartina sauntreklari haqida ma’lumot berildi. Unga koʻra, fiilm uchun Tohir Sodiqov va Shoxrux musiqa yozgan.

“Uch qahramon” filmida jinoyatchilikka qarshi kurashda birdamlik, mardlik, jasorat va qat’iyat ila o‘z xizmat vazifalarini o‘tayotgan bir qancha Ichki ishlar xodimlari faoliyati haqida so‘z boradi.

Afisha.uz avvalroq filmni suratga olish jarayonidan reportaj tayyorlagan edi.