"Oʻrgimchak odam 4" qachon premyera qilinishi ma'lum boʻldi

“O‘rgimchak odam” filmining to‘rtinchi qismi qachon premyera qilinishi ma’lum boʻldi. “The Hollywood Reporter” nashrining xabar berishicha, kinokartina 2026-yil 26-iyulda jahon prokatiga chiqariladi.

Qayd etilishicha, aktyor Tom Holland Piter Parker roliga qaytadi. Film Marvel va Sony kinostudiyalari tomonidan nazorat qilinadi. Suratga olish ishlari 2025-yilning yozida boshlanadi. Kinokartina rejissyori Destin Daniel Kretton (“Shang-Chi va o‘n halqa afsonasi”) boʻladi.

Yangi “O‘rgimchak odam” trilogiyasi 2017-yilda boshlangan. Barcha filmlar umumiy hisobda 3,9 milliard dollar daromad koʻrgan. Bundan tashqari, Tobi Maguayr (2002−2007) va Endryu Garfild (2012, 2014) ishtirokida ham “Oʻrgimchak odam” filmlari mavjud.

Holland uchun bu 2026-yil iyul oyida chiqadigan ikkinchi film bo‘ladi. Aktyor Kristofer Nolanning yangi kinosida ham rol ijro etadi. Bu film premyerasi 17-iyulga moʻljallangan.