HBO bitkoin yaratuvchisi haqida hujjatli film suratga oldi

HBO kompaniyasi tomonidan bitkoin haqida suratga olingan “Money Electric: The Bitcoin Mystery” hujjatli filmi premyera qilindi. Unda kanadalik dasturchi Piter Todd kriptovalyuta yaratuvchisi ekani aytiladi.

Kinokompaniya ma’lumotlariga ko‘ra, Piter Todd 2010-yilda “BitcoinTalk” forumida tasodifan bitkoin yaratuvchisi deya aytiladigan Satoshi Nakamotoning sahifasidan yozishni boshlagan va fosh boʻlgan. Shundan so‘ng ikkala akkaunt ham bir xil vaqt mobaynida tarmoqlarda koʻrinish bermadi. Keyin esa aynan Todd bitkoin kodlariga aynan oʻsha forumda muhokama qilingan funksiyani kiritgan.

Bundan tashqari, Todd va Satoshi ingliz tilida bir xil Britan-Kanada yozuv uslubidan foydalanishgan, deyiladi filmda.

Film chiqqandan so‘ng Piter o‘z ijtimoiy tarmoqlarida “Men Satoshi emasman” deb yozib, kriptovalyuta yaratishga aloqadorligini rad etdi. U “Coindesk” yangiliklar saytiga bergan intervyusida ham hujjatli film mualliflarini tanqid qilgan.

Hujjatli filmning o‘zida ham Todd bilan intervyu bor. “Juda ham kreativ ekaningizni tan olaman. Juda ham bema’ni nazariyalar o‘ylab topyapsiz. Bu kulgili”, — deya javob bergan u bitkoinni ishga tushirishga aloqadorligi haqidagi savolga.