"Omon qolgan bola": Deniel Redkliff Garri Potterdan tashqari nimalar bilan eslanadi?
Yozuvchi Joan Rouling 1997-yilda butun dunyoga mashhur boʻlgan va muallifga millionlar keltirgan “Garri Potter” asarlar seriyasini yozishni boshlaydi. Ushbu seriya nafaqat Joan Roulingni, balki shu qatorda boshqa koʻplab odamlarni ham mashhur qildi. 2001-yilda kitoblar asosida filmlar suratga olishni boshladi va unda asosiy qahramonni Deniel Redkliff ijro etgan.
Bugun, 23-iyul kuni “Omon qolgan bola” ya’ni Garri Potter roli bilan butun dunyoda mashhurlikka erishgan Deniel Redkliffning tugʻilgan kuni. Quyida aktyor juda erta kelgan mashhurlikdan soʻng nimalar bilan shugʻullanayotgani haqida soʻz boradi.
“Garri Potter"dan keyingi filmlari
Yosh sehrgar obrazidan chiqib ketishga urinayotgan Redkliff turli xildagi rollardan oʻzini sinab koʻradi. Ular orasida 2007-yilda chiqqan “December boys” va 2013-yilda premyera qilingan “What if” komedik filmlari bor. Redkliff biografik filmda ham oʻzini sinab koʻradi va “Kill Your Darlings” kinokartinasida amerikalik shoir Allen Ginsberg obrazini gavdalantiradi.
Ammo aktyorga bu filmlar faoliyati avvalida boʻlganidek katta mashhurlik keltirmaydi. Ammo Deniel bu bilan cheklanmaydi. U 2016-yilda “Now you see me 2” filmida kichikroq rolni ijro etadi.
2016-yildagi yana bir film bilan Redkliff koʻplab muxlislar olqishiga sabab boʻladi. U “Swiss Army Man” art-xaus filmida Menni ismli jasad rolini oʻynaydi. Kinokartinada odam qadami yetmagan orolga tushib qolgan Xenk barcha umidlarini yoʻqotishga tayyor edi, ammo qirgʻoqda Redkliff ijrosidagi jasadni topgach, hammasi oʻzgaradi.
Aynan ushbu roli bilan aktyor koʻp narsalarga qodir ekani va yosh sehrgar obrazidan chiqib keta olganini isbotlaydi.
Bundan tashqari, u 2020-yilda premyera qilingan qamoqdan qochish haqidagi “Pretoriyadan qochish” filmida ham bosh rolni ijro etadi. Bu film oʻzbek tomoshabinlari orasida ham mashhur hisoblanadi.
Ma’lumot uchun, Deniel Redkliff teatr aktyori ham hisoblanadi. Shuningdek, bir nechta televizion loyihalarda prodyuserlik qiladi. Shunga qaramay hozirgacha aktyor asosan Garri Potter roli bilan eslanadi. Redkliff uzoq davom etgan ajoyib hikoyaning katta bir boʻlagi sifatida yodimizda qoladi.
