"Rick and Morty"dan "South Park"gacha: Kattalar uchun ishlangan multseriallar
Multfilmlar va animatsion seriallari asosan bolalar uchun ishlanadi. Ammo kinematografiya va animatsiya sohasida norasmiy “kattalar uchun multseriallar” janri ham bor. Avvaliga Amerikada mashhur boʻlgan bunday seriallar keyinchalik butun dunyoga mashhur boʻldi.
Afisha.uz dam olish kunlarida tomosha qilish uchun multseriallar toʻplamini taqdim etadi.
“Rick and Morty” (2013 — h.v.)
“Rik and Morti” kattalar uchun ishlangan animatsion ilmiy-fantastik, komedik multserial hisoblanadi. U ilk bora 2013-yilda premyera qilingan.
Multserial olamlar boʻylab sayohat qiladigan chol va nabira haqida hikoya qiladi. Unda aql-bovar qilmas sarguzashtlar, qora hazillar va kutilmagan finallarni uchratish mumkin.
Mavsumlar soni — 7 ta.
“BoJack Horseman” (2014 — 2020)
“BoJack Horseman” 2014-yil 22-avgustda premyera qilina boshlangan Netflix striming xizmati uchun Rafael Bob-Uoksberg tomonidan yaratilgan shou-biznes yulduzi haqidagi animatsion tragikomedik serial hisoblanadi.
Multserialning avvalida BoJack oʻrta yosh inqirozni boshdan kechiradi. U oʻzining avvalgi mashhurligi va ommaga boʻlgan muhabbatini qaytarish uchun avtobiografik kitob yozishga harakat qiladi, lekin oʻzining dangasaligi tufayli muvaffaqiyatsizlikka uchraydi.
Mavsumlar soni — 6 ta.
“South Park” (1997 — h.v.)
“South Park” animatsion seriali “Simpsons"dan keyingi eng uzun davom etayotgan multserial hisoblanadi. U Kolorado shtatidagi Janubiy park kichik shaharchasidagi bir necha uchinchi sinf oʻquvchilarining hayotidagi gʻalati hikoyalar haqida hikoya qiladi.
“South Park” grotesk, fars, parodiya elementlaridan iborat komediya boʻlib, qora yumorga boy multserial hisoblanadi.
Mavsumlar soni — 26 ta.
“Arcane"(2021 — h.v.)
“Arcane” League of Legends oʻyinlari olamiga asoslangan fantastik sarguzasht janridagi animatsion serial. Ammo bu durdona asardan zavqlanish uchun oʻyindan xabardor boʻlish shart emas.
Bu multserial tomoshabinni hayajonli sarguzashtlar va mistik sirlar olamiga olib ketadi. Animatsion serialning syujeti ikki shaharda gullab-yashnayotgan, utopik Piltover va zolimlarga toʻla Zaunda sodir boʻlayotgan voqealarni namoyish etadi.
Mavsumlar soni — 1 ta.
“Love Death & Robots” (2019 — h.v.)
“Love Death & Robots” har biri yarim soatdan kamroq davom etadigan antalogik serial. Har bir qism alohida hikoyani oʻz ichiga oladi. Serial turli aktyorlar va jamoalar tomonidan ishlab chiqarilgan.
Har bir qismning film nomida aytib oʻtilgan uchta mavzuga aloqasi boʻladi. Netflix striming platformasi buyurtmasiga binoan ishlangan animatsion serial kattalar uchun moʻljallangan hisoblanadi.
Mavsumlar soni — 3 ta.
“Gravity Falls"(2012 — 2016)
Jamlanmadan oʻrin olgan Disney kompaniyasi tomonidan ishlangan yagona serial — “Gravity Falls”. Unda yozgi ta’tilni amakisi bilan oʻtkazish uchun sirli Graviti Folz shaharchasiga kelgan opa-uka Meybl va Dipper haqida hikoya qilinadi.
Animatsion serial yaratuvchisi Aleks Xirsh X (sobiq Twitter)da serial asosida komikslar yaratilishini e’lon qilgandi. Keyinchalik 2018-yil 24-iyulda komikslar e’lon qilingan.
Mavsumlar soni — 2 ta.
“Family Guy"(1999 — h.v.)
Syujet amerikalik oddiy oila, Griffinlar oilasi, ota-onalar Piter va Lois, ularning farzandlari Kris, Meg va Styui hamda gapira oladigan kuchuk Brayandan iborat.
“Family Guy” kattalar uchun ishlangan sitkom hisoblanadi.
Mavsumlar soni — 22 ta.
