"Buyuk diktator"dan "Graf"gacha: Diktatorlar haqida 7 ta film
Insoniyat tarixida XX asr oʻzining diktatorlari bilan qoladi. Shuningdek, aynan ushbu davrda kinematografiya sohasi ham rivojlanib bordi. Bilamiz-ki, san’at har qanday cheklovlarni cheklab oʻtadi va diktatorlar qoʻyadigan taqiqlar ham isitisno boʻlmaydi.
Afisha.uz ushbu jamlanmada tiranlar haqida ishlangan mashhur filmlar boʻyicha ma’lumot beradi.
“Diktator”
The Dictator
Janr: komediya, drama
Suratga olingan yil: 2012
Rejissyor: Larri Charlz
Oʻziga xos “baza"dan boshlaymiz. Sasha Baron Koen ijro etgan admiral-general Haffaz Aladin obrazini koʻrmagan odam kam boʻlsa kerak. Kinokartina nafaqat diktatorlar haqidagi, balki komedik filmlar uchun ham etalon hisoblanadi.
Sinopsis: Oʻzining berayotgan mehridan qiynalayotgan mamlakatiga demokratiya kirib kelishiga yoʻl qoʻymaslik uchun hayotini xavf ostiga qoʻygan diktatorning qahramonlik hikoyasi.
“Buyuk diktator”
The Great Dictator
Janr: harbiy, komediya
Suratga olingan yil: 1940
Rejissyor: Charli Chaplin
Charli Chaplin, asosan, ovozsiz kinolardagi rollari bilan mashhur. Ammo u faoliyati davomida ovozli kinolarda ham rol oʻynagan. “Buyuk diktator” filmida Chaplin Adolf Gitlerga parodiya qilgan va uning ishlarini kulgi ostiga olgan. Shuningdek, filmda yana bir tiran Mussolini obrazini ham koʻrishimiz mumkin.
Sinopsis: Birinchi jahon urushidan soʻng, Tomaniya mamlakati taxtiga kuchli va shafqatsiz diktator Adenoid Hinkel oʻtiradi. Uning asosiy maqsadi dunyo hukmroniga aylanish.
“Intervyu”
The Interview
Janr: komediya, jangari
Suratga olingan yil: 2014
Rejissyor: Set Rogen, Evan Goldberg
Albatta, ushbu jamlanmani Kim Chen In haqidagi filmsiz tasavvur qilib boʻlmasdi. XXI asrning eng mashhur diktatori haqida ham komedik film ishlangan.
Sinopsis: Deyv doʻsti Aaron prodyuserlik qiladigan mashhur tok-shou boshlovchisi. Ikki doʻst uzoq vaqtdan beri haqiqatan muhim ish qilishni orzu qilardi. Ular Shimoliy Koreya diktatori Kim Chen Indan intervyu olishga qaror qiladi.
“Stalinning oʻlimi”
The Death of Stalin
Janr: harbiy, komediya
Suratga olingan yil: 2017
Rejissyor: Armando Iannuchchi
Qora yumorga boy tarzda ishlangan “Stalinning oʻlimi” siyosiy satirik filmi Rossiyada taqiqlangan. SSSR hukmdori boʻlgan Iosif Stalin 1953-yil 5-mart kuni vafot etadi. Film Stalindan keyingi hokimiyat uchun boʻlgan siyosiy kurash voqealari haqida hikoya qiladi.
Sinopsis: SSSR, 1953-yil. Butun mamlakat bir odamdan qoʻrqib, titraydi. Mart oyining boshida Bosh kotib vafot etadi. U olamdan o‘tgach, hokimiyat uchun kurash, poyga boshlandi!
“U yana shu yerda”
Er ist wieder da
Janr: komediya, hujjati
Suratga olingan yil: 2015
Rejissyor: David Vnendt
XX asrda yashab oʻtgan diktatorlarni XXI asrda koʻrish qiziq boʻladi. “U yana shu yerda” filmi ham zamonaviy Germaniyaga tushib qolgan Adolf Gitler haqida hikoya qiladi.
Sinopsis: Berlin, hozirgi kunlar. XX asrda avvaliga Germaniyani, keyin esa insoniyatni dahshatga solgan diktator Adolf Gitler Berlinda oʻziga keladi. Bu vaqtda uning na hukumati, na tarafdorlari, na yashash uchun joyi bor edi. Ammo Adolfda eng quyidan eng yuqoriga koʻtarilish boʻyicha koʻnikma yetarlicha.
“Graf”
El Conde
Janr: komediya, qoʻrqinchli
Suratga olingan yil: 2023
Rejissyor: Pablo Larrain
Nihoyat Janubiy Amerika dikatatorlariga ham murojaat qilamiz. Chili sobiq prezidenti Augusto Pinochet haqida Netflix “Graf” filmini ishladi. Qiziqarli tomoni bu diktatorlar haqidagi boshqa filmlardan oʻz janri bilan farq qiladi. “Graf” voqealar rivojining yangicha talqini taqdim etadi.
Sinopsis: Chili diktatori Augusto Pinochet vampirga aylanadi. 250 yillik hayotdan keyin esa oʻlishga qaror qiladi.
“Ertak”
“Сказка”
Janr: fentezi, drama
Suratga olingan yil: 2022
Rejissyor: Aleksandr Sokurov
Jamlanmani rossiyalik rejissyor Aleksandr Sokurovning eksperimental, badiiy, tarixiy-fantastik filmi bilan yakunlash toʻgʻri boʻladi. Chunki film aniq bir personaj emas, balki koʻplab diktatorlar haqidadir.
Sinopsis: Narigi dunyoda Stalin Adolf Gitler, Uinston Cherchill, Benito Mussolini va Napoleon Banopart bilan uchrashadi.