"Haqiqiy otalar haqida hikoya qiladi". "Super dada" filmi premyerasidan reportaj
23-avgust kuni Magic Cinema kinoteatrida serqirra ijodkor Muhammad Ali Navruzovning navbatdagi “Super dada” nomli filmi premyerasi bo‘lib o‘tdi. Taqdimotda rejissyorning yaqinlari, taniqli o‘zbek san’atkorlari va blogerlar ishtirok etdi. Afisha.uz muxbirlari film premyerasidan reportaj tayyorladi.
Tug‘ilgan kunida o‘z ijod mahsulini premyera qilishga odatlangan Muhammad Ali Navruzov joriy yil ham an’anasiga sodiq qolgan holda yaqinlari va hamkasblari davrasida “Super dada” filmining taqdimotini o‘tkazdi.
Filmda rol ijro etgan xonanda Shohruhxon ukasi Muhammad Ali Navruzov haqida gapirarkan, “Bundan zo‘r rejissyor va tashkilotchi chiqarkan. Men buni bilmasdim. Ushbu filmni suratga olish jarayonida bunga guvoh bo‘ldim. „Super dada“ omadli loyiha bo‘lishini istab, Muhammad Alining keyingi ijodiy faoliyatiga muvaffaqiyatlar tilab qolaman”, — dedi xonanda.
Film rejissyori Muhammad Ali Navruzovning aytishicha, u suratga olish jarayonida taniqli rejissyor bo‘lgan onasi Zebo Navruzovaning yordamiga ehtiyoj sezmagan.
“Onam yigirma yildan ortiq vaqtdan beri kino olib kelayotgan bo‘lsa, doim yonida birga bo‘lganman, suratga olish jarayonlarini ko‘rib, ulg‘ayganman. Bu esa menga tajriba bo‘lgan. Shu tajriba orqali kino olishga, mustaqil ijod yuritishga harakat qilyapman. “Super dada"ni ham onamning yordamisiz oldik. Bundan tashqari, bugungi aktyor, bloger va qo‘shiqchilarimizning o‘zi juda iste’dodli, ularga o‘rgatish shart emas. Ammo ularning vaqtini topish biroz muammo bo‘ldi. Eng muhimi, tomoshabinlar film haqida xolis fikrlarini bildirishlarini kutib qolaman”, — dedi u.
Aktyor Bekzod Tadjiyevning so‘zlariga ko‘ra, mazkur kinoda haqiqiy otalar haqida hikoya qilinadi. “Bo‘rilar” filmini sog‘ingan tomoshabinlar uchun “Bo‘rilar” ijodkorlaridan kutilmagan film bu. “Super dada"ni hammaga tomosha qilishni tavsiya etaman”, — dedi aktyor.
Kartinada O‘zbekistonda xizmat ko‘rsatgan artist Nozim To‘laxo‘jayev, xonanda Shohruhxon, aktrisa Durdona Qurbonova, aktyorlar Bekzod Tadjiyev va Muhammad Ali Navro‘zov, bloger Bonamur (Umida Abdug‘afforova) va boshqalar rol ijro etishgan.
Filmni 24-avgustdan 23 TV mobil ilovasi hamda Magic Cinema kinoteatrida tomosha qilish mumkin.
