JCh-2026 saralash. Oʻzbekiston 3-bosqichda Eron, Qatar va boshqalar bilan "A" guruhidan joy oldi
27-iyun kuni Kuala-Lumpurdagi OFK bosh qarorgohida futbol boʻyicha 2026-yilgi Jahon chempionatiga saralashning 3-bosqichiga qur’a tashlandi. Turnir AQSh, Kanada va Meksikada boʻlib oʻtadi.
3-bosqichga oʻtgan 18 ta terma jamoa FIFA reytingiga qarab 3 tadan 6 ta savatchaga ajratildi. Oʻzbekiston milliy terma jamoasi Saudiya Arabistoni va Iordaniya bilan birgalikda 3-savatchadan joy olgandi (bu degani bu jamoalar bir-biri bilan oʻynamaydi). Ular Jahon chempionati yoʻllanmasi uchun 6 tadan uchta guruhga ajratildi.
Qur’a natijalariga koʻra, Oʻzbekiston milliy terma jamoasi “A” guruhidan oʻrin oldi. Umumiy qur’a natijasi quyidagicha:
“A” guruhi:
- Eron
- Qatar
- Oʻzbekiston
- BAA
- Qirgʻiziston
- Shimoliy Koreya
“B” guruhi:
- Janubiy Koreya
- Iroq
- Iordaniya
- Oʻmon
- Falastin
- Quvayt
“C” guruhi:
- Yaponiya
- Avstraliya
- Saudiya Arabistoni
- Bahrayn
- Xitoy
- Indoneziya
Srechko Katanes shogirdlari ilk oʻyinini 2024-yilning 5-sentyabr kuni KXDR jamoasiga qarshi Toshkentda oʻtkazadi. 3-bosqichdagi uchrashuvlar roʻyxati quyidagicha:
- 1-tur. 5-sentyabr: Oʻzbekiston — KXDR;
- 2-tur. 10-sentyabr: Qirgʻiziston — Oʻzbekiston;
- 3-tur. 10-oktyabr: Oʻzbekiston — Eron;
- 4-tur. 15-oktyabr: Oʻzbekiston — BAA;
- 5-tur. 14-noyabr: Qatar — Oʻzbekiston;
- 6-tur. 19-noyabr: KXDR — Oʻzbekiston;
- 7-tur. 20-mart (2025-yil): Oʻzbekiston — Qirgʻiziston;
- 8-tur. 25-mart: Eron — Oʻzbekiston;
- 9-tur. 5-iyun: BAA — Oʻzbekiston;
- 10-tur. 10-iyun: Oʻzbekiston — Qatar.
Mazkur guruhlarda 1−2-oʻrinlarni egallagan jamoalar (3 ta guruhdan jami 6 ta) toʻgʻridan-toʻgʻri Jahon chempionatiga yoʻl oladi. 3−4-oʻrinlarni qoʻlga kiritgan 6 jamoa esa 4-bosqichda 3 tadan ikki guruhga boʻlinib kurashni davom ettirishadi. Bu guruhlarda 1-oʻrinni qoʻlga kiritgan 2 terma jamoa ham AQShga yoʻl oladi. Bu guruhlarda 2-oʻrinni qoʻlga kiritgan jamoalar oʻzaro kuch sinashishadi va gʻolib qit’alararo oʻtish oʻyinida oʻynaydi. Shu tariqa JCh-2026 da Osiyo qit’asidan maksimal 9 ta terma jamoa qatnashishi mumkin.